其實一直以嚟，我都好小講自己既野，但唔知點解，望住自己本書出現，就有好多野想分享。本書內有講一直以嚟爆炸頭出現既故事，講朋友、回憶童年、愛情、友情、小劇場，主要嚟講，用一個自己懶灰諧既角度講出香港人既生活。
仲記得，我人生第一份全職工作，係十八歲那年，記得當時仲未畢業，就已經得到了一份工作 ─平面設計師。畢業那一晚，就是上班的前一夜，還未有多餘時間去想著畢業後，未來的日子該怎麼走，又或是來個畢業旅行，來為學業劃上句號，就已經開始正式踏入社會。
「十八歲就做嘢？唔再進修下？」,「九十後喎，好後生喎」依啲說話係我見到每個人必聽到嘅說話。但慶幸既係，我工作，思維既能力從來冇受過質疑，同老細關係都好好，學歷只不過係紙一張，學到幾多嘢係睇你咩心態，我成日都係咁諗。人嘅成就唔取決於讀幾多書，當然我知道現實社會好多人唔係咁諗。得罪講句，所謂嘅老師又教到你幾多嘢。讀得多書個D白痴，亦都只會叫你將一生拉勻嚟睇，所以現今網絡之大，每一個人都可以係老師，所以我一直認為工作經驗遠重要於學歷。
不過如果你問我有機會去外國讀/進修，想唔想?
我會好肯定咁答你，想
但依啲機會唔係人人都有，人，總要認清現實
肯付出，靠自己亦可以學得到
人打機，我畫嘢；人唱K，我畫嘢
人開P，我畫嘢；人拍拖，我畫嘢
人扑野，我......不要再說了
回想返打工嘅日子，差唔多4年前後2間公司，主要負責做品牌，同廣告設計。18歲嘅時候，我有著比多數同年人都高嘅收入。19歲嘅時候，有能力比家用，買自己想要嘅嘢。22歲嘅時候，已經唔知OT過幾多個夜晚。但回望隔籬個老坑，唔係，同事先啱，唔通我大個左，就同佢一樣，維持住咁嘅狀態?真係我想過既生活?高地位，收入係每個人夢寐以求，都令每個人趨之若鶩。但我覺得唔需要為追求而追求，撫心自問，咁樣你過得開心咩?
坦白講，一年前，辭左職自己開個Page畫吓嘢，我記得開page個日好似係情人節，但實際開始畫野係四月，點解我要揀情人節嚟開page?人地拍拖，我冇事幹，屎忽痕又好得閒，好Q得閒呀嘛，吹咩。當初一開始，撿撿下舊相，就想起畫卡通人物既成長，再去到雨傘革命，一路以嚟又再講下生活，有水就抽，講自己想講嘅嘢，接吓Freelance。收入嚟講，的確大不如前，付出嘅心力，時間亦相對要多好多好多，日做夜做，日畫夜畫，點解都係咁窮，Sosad。每一日，雖然都會有無數煩惱，有種種困惑，但起碼，我好清楚自己做緊咩，為自己而生活，生活得似返個人。
如果我當初冇毅然辭職，我唔敢講目前有咩成就，但依本書絕對唔會出現，亦都唔會識到大家。所以我相信，30歲嘅時候，望返轉頭，我會為自己依一個決定而感到自豪，我一直以嚟，都唔知依條路係唔係啱，因為本來就冇存在對與錯，但我只係知自己一定唔會後悔，咁就足夠。反正，我依家好開心。最後想講既係，多謝你地既每一個加油，支持，留言，先能夠一步一步咁行到今日。
-----------
新書《爆炸頭的世界》已推出
書展-點子出版(1A-C12)
哈佬黃簽書
7月19日(日),下午3:00-4:00
希望到時見到你地啦,多謝
Search